Rain alert : हवामान खात्याने दिलेल्या माहितीनुसार, राज्यात पुढील दोन दिवस म्हणजेच शनिवार आणि रविवारपासून पावसाचा जोर वाढण्याची शक्यता आहे. विदर्भ, मराठवाडा, मध्य महाराष्ट्र आणि कोकण किनारपट्टीच्या काही भागांमध्ये मुसळधार पाऊस अपेक्षित आहे. त्यामुळे नागरिकांनी आवश्यक ती खबरदारी घ्यावी, असे आवाहन करण्यात आले आहे.Rain alert
विदर्भ, मराठवाडा आणि मध्य महाराष्ट्रात यलो अलर्ट
आज विदर्भातील सर्व जिल्ह्यांसाठी यलो अलर्ट जारी करण्यात आला आहे. यामध्ये बुलडाणा, अकोला, अमरावती, वाशीम, यवतमाळ, नागपूर, भंडारा, गोंदिया, गडचिरोली आणि चंद्रपूर या जिल्ह्यांचा समावेश आहे. या भागांमध्ये काही ठिकाणी जोरदार पावसाची शक्यता आहे.
मराठवाड्यातील छत्रपती संभाजीनगर आणि जालना जिल्ह्यांमध्ये हलका पाऊस अपेक्षित आहे. याव्यतिरिक्त, बीड, लातूर, धाराशिव, परभणी, हिंगोली आणि नांदेड जिल्ह्यांसाठीही यलो अलर्ट देण्यात आला आहे.
मध्य महाराष्ट्रातील पुणे, सातारा, सांगली, सोलापूर, कोल्हापूर आणि अहमदनगर जिल्ह्यांमध्येही पावसाची शक्यता आहे.Rain alert
कोकणासाठी ‘ऑरेंज अलर्ट’
सोमवारसाठी कोकण आणि घाट परिसरात जोरदार ते अति जोरदार पावसासाठी ऑरेंज अलर्ट जारी करण्यात आला आहे. यामुळे या भागातील नागरिकांनी अधिक सतर्क राहावे.
पुढील आठवड्यातही पावसाची शक्यता
मंगळवार आणि बुधवारसाठीही काही भागांमध्ये जोरदार पावसाची शक्यता वर्तवण्यात आली आहे. यात खान्देशातील तीन जिल्ह्यांचा काही भाग, तसेच विदर्भ, मराठवाडा आणि मध्य महाराष्ट्राच्या काही भागांचा समावेश आहे. त्यामुळे पुढील आठवड्याच्या सुरुवातीलाही पाऊस सुरूच राहील, असा अंदाज आहे.Rain alert
